Nuove scoperte su Madaleno Jouvenal

Madaleno Jouvenal de San Peire (val Varacho) e Margarido Dijon, destin óublida

di Anne Laberinto

Anne Laberinto è un’appassionata ricercatrice di Carpentras (Provenza).  Appassionata alla figura di Maddalena Giovenale (Madaleno Jouvenal), mia antenata, ritenuta l’ispiratrice di Frederì Mistral, ha compiuto ricerche a Sampeyre e soprattutto in Provenza, scovando nuovi dati e la tomba di Margherita, figlia di Madaleno. Il suo lavoro verrà pubblicato prossimamente da Lou Temp Nouvel, cahier d’estudi ousitan, a cura di Jan Peire de Bousquier. Il testo che segue, a cura di Anne Laberinto, è scritto in grafia mistraliana.

Maria Maddalena nais Rùa di Rous ( amèu di Rossi), coumuno de Sampeyre dins lou Marquisat de Saluzzo, atualo Val Varaita, lou 13 de jun de 1832, de Pietro Giovenale (1799/1866) e de Nello Margherita (1808/1876). Es la segoundo di dès enfant de la famiho Giovenale que n’en perdra quatre entre li neissenço de 1829 à 1852.

A la bello sesoun , Pietro soun paire faturo soun paure bèn mai avans l’ivèr cargo sa « balo »(1) de cóu-pourtaire pèr chabi en Prouvenço de marchandiso de touto merço muni dóu passoport indispensable à sa circulacioun.

Aquelo ativita coumercialo sara seguido pièi pèr dos autri generacioun de la famiho enjusqu’à Giovanni Antonio lou felèn que sara prouprietàri d’un negòci de tissu e coufeicioun de vèsti à Castèu-Reinard.

A l’autouno de 1850, quitant si mountagno, soun espouso e sis autris enfant, Pietro Giovenale s’endraio pèr Prouvenço emé tres de si « drole » , es à dire : Maddalena 18 an, Pietro 15 an e Giovanni 13 an.

En passant à Barcilouneto, beléu que Pietro e Giovanni s’arreston pèr trouba d’embaucho, vo bèn se logon en cous de routo dins d’esplecho aguènt besoun de man d’obro vo encaro,countunion vers la Crau pèr se ié fissa coume pastrihoun. Un an, soun emé soun paire au Mas dóu Juge car Mistral dins l’Armana Prouvençau de 1858 conto que «Après soupa d’avans s’ana jaire, Mestre Pèire (Giovenale) fasié recita à sis fiéu un Noste Paire forço semblant à n’aquéu di Vaudés. »

Se li drole Giovenale fan soulamèn passage à Maiano en 1850 Maddalena, elo, es engajado coume tanto (2) au Mas du Juge encò de Francés Mistral ounte Mestre Pèire avié coustume de s’arresta à chasque vengudo en Prouvenço. Aquest’autouno 1850 la mestresso Delaïdo a proun besoun d’ajudo pèr teni soun oustau mounte s’entaulon cade jour tres varlet de mas e un bergié.

La pichoto piemounteso qu’a jamai treva que soun amèu de Sampeyre, que s’esprimo, urousamen, dins un dialete procho d’aquéu de Prouvenço, que counèis pas lis us dóu pais e que porto à soun arribado la rudo vestiduro de mountagnardo, mes de segur un tèms à s’asata. Souleto, en fin de journado a estaja dins l’alo di doumesti, au mitan d’ome fa, en foro d’un varlet de soun âge, sa jouinesso, l’asseguranço d’uno vido meiouro e lou bon voulé de sa mestresso l’empachon, de segur, de trop pensa à sa maire e à sa famiho , leissado tant liuen d’elo.

A la debuto d’avoust de 1851 Frederi, sis estùdi de dre fenido à 21 an, arribo fierot coume un galoun au mas quouro l’oustalado au fres souto la triho es à mand de soupa :

« -Bon vespre à tóuto la coumpagno ! s’escrido lou jouvènt

-Diéu te lou donne Frederi !

-Paire, Maire, tout vai bèn ! Aqueste cop bello finido !

-E bello deliéuranço ! ajustè la jouvo piemounteso que servié dins lou mas. »(3)

Aqui,l’on pòu estre suspres qu’uno pichoto servicialo (a mens d’estre proun delurado) se permete de prendre paraulo alors que se saup que Mestre Francés Mistral, ome bon , es rigouriste quant à la plaço de cadun dins soun oustau. Es poussible peréu, que gagnado pèr la joio famihalo dóu tourna definitiéu dóu fiéu, la jouvento óublido que n’es qu’uno pauro servicialo estrangiero.

Vo encaro, qu’elo e Frederi se couneissien déjà…

Que que siegue, à coumta d’aquéu retour, Frederi e Maddalena se coustejon cade jour. Lou jouvènt que pamens manco pas de galanto dins Maiano es-ti atriva pèr aquelo poulido chato que noun semblo à si counquisto abitualo ? Segound la tradicioun uno idilo nais entre éli, mai lou segne paire Mistral ié mes léu empacho e la servicialo es couchado dóu Mas dóu Juge. Maddaleno noun tourno en Piémount retrouba sa famiho.

Se la roumanço es vertadiero, rèn empacho pièi Frederi de retrouba Madaleno restado à Maiano quouro lou 4 de setembre 1856 defunto lou paire Mistral e que Frederi ‘mé Delaïdo soun óublija d’abandouna lou mas pèr veni viéure dins lou vilage. Se li sentimèn de Frederi pèr Madaleno soun itant fort que s’es dis, qu’es verai qu’a ispira « Mirèio », que soun paire defunta, es libre de mena sa vido, pèrqué pas l’aguè recatado emé sa maire à l’oustau meirenau ?

Se póu pensa peréu que, aleva l’istòri d’uno aventuro emé Frederi, Madaleno es encaro servicialo au mas avans qu’arribo lou décès dóu Mestre . Counèis despièi dous an Francés Dijon, un jouvènt d’Eirago,nascu lou 16 d’ óutobre de 1825 à Gravesoun , l’espouso en 1856 e quito si baile.

Maddalena e Francés

Francés Dijon es lou quatren enfant de Jaume Dijon mounié au tenamen dóu Breuil à Gravesoun e de Catarino Ichet soun espouso. L’enfant perd soun paire en 1829 alors Catarino e si cinq pichot quiton lou Breuil pèr s’istala à Maiano, mounte, elo, devèn servicialo alors que sis enfant soun plaça encò de gènt dóu vilage coume pichot doumesti. Francés tre l’age de 11 an gagno soun pan coume bergié. Au fiéu dis an la freirié grandis e se disperso. Soulet , Francés resto emé sa maire e part pèr Eirago ounte se trobon d’autri Dijon de la memo famiho paternalo.

Coume Madaleno e Francés se soun-ti rescountra ? n’en sabèn rèn à l’ouro d’aro senoun qu’en 1854 se parlavon deja car un counsentimen di gènt de Madaleno à soun maridage, establi en Piémount pèr lou noutàri reiau de Castéu-Dèufin, es recaupu en coumuno de Maiano lou 22 de decembre d’aquesto annado 1854.

A dounc, lou 16 janvié de 1856, un dimecre, à 4 ouro dóu tantost lou conse de Maiano Jan-Batiste Roux unis François Dijon, 31 an, meinagié e Marie-Magdeleine Giovenale, 24 an, doumestico. Lou nòvi acoumpagna de sa maire es assista de : Jean Busquet, mestre maçoun, 41 an e Désiré Salban oubrié maçoun, 21 an, de Maiano.

La nòvio es assistado de soun paire Pietro Giovenale qu’es en Prouvenço en aqueste moumèn e si temouin soun : Gabriel Daillan,28 an, négouciant e … Frédéric Mistral, 26 an, prouprietàri , tóuti dous de Maiano.

A la signaturo de l’ate de maridage, es nouta que ni li nòvi, ni la maire dóu nòvi an pousgu signa

estèn iletera.

Lou couble planto caviho quartié di Sarressanes en Eirago ounte viéu Catarino la maire de Francés . Lou 13 de janvié de 1857, à uno ouro dóu matin,dins lou nis di Dijon, uno pichoto Margarido (dóu prenoum de sa grand de Sampeyre) vèn embeli lou fougau.

Ai-las ! A peno couneigudo la tendresso maternalo, la pichoto n’es separado un an e miejo après.

Pèr de resoun jamai elucidado fauto de doucumèn, la pauro maire intro à l’ouspice dis indigènt de Sant-Roumié de Prouvenço lou 24 d’outobre de 1859. Afeblido pèr quauquo marrido malautié vo separado de soun espous (es marcado abitant Maiano !) Maddalena Giovenale devengudo dins l’amenistracioun de l’ouspice Magdeleine Jauvenal s’amousso dins la soulitudo, lou 11 de nouvembre 1859 à tres ouro dóu sèr.

Lou menusié Carle Faure e lou survihant is enterramen Jaume Rouvière signon lou registre di defunta. Dins uno toumbo coumuno s’escafo, à 27 an, lou destin de la jouvo piémounteso de Sampeyre qu’avié quita soun amèu de misero di Rous pèr l’espèr d’uno vido meiouro…

Senso provo, s’es afierma qu’à la mort de sa femo, Francés Dijon s’es engaja dins l’armado e qu’a peris en Argié. Un ate de décès de 1871 que courrespound bèn au meme Francés Dijon es transcris dins la coumuno de Gravesoun en 1872, (4) pamens Francés Dijon a jamai quita sa famiho. bord que dins li recensamen, es meinagié à Eirago dins tóuti lis annado seguènt la despartido de soun espouso. .Lou mistèri d’aquelo trascricioun demoro irresoulu…

Margarido e Pèire Chabert

Margarido s’abaris i Sarressanes dins l’afecioun de soun paire e de sa grand Catarino que fan ço que podon pèr coumbla lou manco d’amour maternau.

Se lou liame entre Francés Dijon e soun bèu-paire Pietro Giovenale s’es pas desliga après la mort de Maddalena, es poussible qu’aquéu rescountro jusqu’à si nouv-an sa feleno tant que vèn en Prouvenço e acò enjusqu’en 1866, bord que i’a establi un pichot negòci de marchand-cóu-pourtaire à Castéu-Reinard.

Mai o mens d’escolo baio à Margarida de rudimen de leituro e uno poulido façoun d’escriéure, de signa plus tard soun noum de femo e de saupre maneija plus tard lis escrituro dóu fougau.

A l’asard dóu travai, Francés Dijon qu’es pas prouprietàri chanjo souvènt de liò de travai. En 1872 es au quartié Cassoulen à Gravesoun emé sa maire e sa chato que maugrat la rudo vido paisano devèn uno adoulescènto remarcado. Manquant pas de vesita lis ouncle, tanto e cousin Dijon de Maiano tout proche ié rescontro Pèire Chabert un jouve paisan maianen.

Li dous s’amourejon e lou 18 de nouvembre 1875, Margarido 18 an e Pèire 25 an se marridon à Gravesoun à set ouro dóu vespre pèr lou Conse Louvis Coeur, noun senso que fugue attesta segound enquisto que Magdeleine Jauvenal èro bèn la defunto maire de Margarido.

Gaire après lou maridage, la famiho s’entourno mai i Sarressanes à Eirago.

Lis ome s’escarnisson à tira autant que se póu soun pres-fa. Margarito tèn l’oustau en s’óucupant de sa grand intrado dins l’age e qu’à la fin d’uno eisistènçi de trimo achinissento (fuguè véuse à trente sièis an emé cinq pichot à abali) s’en anè dignamen à quatre vint tres an dins l’afecioun de sis enfant, lou 28 de decembre de 1877.

Pèire e Margarido que soun voulountàri e courajous, van, après la despartido de Catarino s’establi coume meinagié au Grand Mas Blanc dis Aupiho pièi à Sant Lambert, tenamen situa entre li coumuno de Tarascoun e de Sant Roumié. Francés que, maugrat si 57 an es un ome encaro fort e roubuste lis acoumpagno.

En 1891 quiton Mas-Blanc pèr se faire « fermiers » à Maiano tout en abitant dins lou vilage mounte fin finalo, abandounant lou travai de la terro, ié duerbon un especiarié que tenon enjusqu’à l’ouro de la retirado.

Margarido a sa parentelo Dijon e Chabert à Maiano, mai Castéu-Reinard es pas lieun.

Soun cousin Giovanni Antonio françisa en Jean Antoine Giovenale ié tèn lou negòci de vèsti e tissu, crea pèr soun grand de Sampeyre. Rèn nous dis si Margarito a un liame em’éu, emé sa femo vo emé li quatre chato Giovenale de Castéu Reinard .A mens que la memòri de sa maire Madaleno fugue de toustèms escafado pèr de resoun ignourado encuèi.

Margarido que dins soun especiarié saup tout ço que se passo dins lou vilage , noun pòu ignoura la renoumado dóu pouèto Frederi Mistral e lou rescontro de segur. A-t’elo soulamen sachu que sa maire fuguè servicialo au mas dóu Juge ? Quouro Mistral la vèi, ié revèn-ti encaro lou souveni de la pichoto servicialo de sa jouinesso e se demando-ti pas de cop que, se lou destin l’avié vousgu ( e que l’istòri fugue vertadiero), Margarido aurié pousgu estre l’enfant que mancavo à soun fougau ?!

Francés Dijon que s’es jamai alieuncha de sa chato e de soun gèndre defunto lou 9 de setembre de 1908 à 83 an dins l’oustau de famiho carriero de l’Espitau à Maiano.

Pèire Chabert s’en vai lou 6 de mars de 1934 à 83 an, Margarito lou 6 de fébrié 1938 à 81 an après uno vido coumplido dins lou travai e lou respèt famihau.

A Sampeyre lou 31 avoust 1963 en recors de «Madaleno Juvenal» uno lauso es pausado à l’intrado dóu cementèri pèr lou Felibrige e l’Escolo dóu Po, emé uno pougnado de terro dóu Mas dóu Juge .

S’es evouca de mant’uno façoun Maddalena Giovenale senso gaire de provo definitivo de ço que fuguè soun court passage en Prouvenço.

Lou deveni de Francés Dijon soun espous, de Margarido e Pèire Chabert qu’an pas agu de descendènçi soun éli resta coumpletamèn ignoura.

Rua di Rous à Sampeyre un esmouvènt paret arrouina escoundu souto l’èurre ,es tout ço que resto de l’oustau di Giovenale.

(1) balo : malo de cóu-pourtaire pourtado sus l’esquino.

(2) tanto : servicialo

(3) Memòri e raconte :Mistral .

(4) Ate trascri à Gravesoun lou 16/4 /1872 dóu mortuorum de Francés Dijon, 24 an, à l’espitau militàri dóu Dey, Alger, soudard au 63 ème Regimen de ligno. Nascu à Gravesoun de Jaume Dijon e Catarino Ichet .